Informashon en konekshon ku inisio di temporada di Orkan.

Algun tep i konseho di parti di Krus Kòrá.

 

Pa promé di yüni temporada di orkan ta kuminsá. Ta den e periodo aki te ku fin di novèmber tin formashon di áreanan ku preshon abou di atmósfera den nos region dor di kual mal tempu ku bientunan fuerte por surgi okashonando tormentanan òf orkanan.

Ta hasi distinshon entre tres tipo di mal tempu ku preshon abou:

  1. Depreshon Tropikal ku ta mal tempu ku bientunan ku ta keda bou di 61 km pa ora
  2. Tormenta Tropikal ku ta mal tempu ku bientunan entre 61 pa 119 km pa ora
  3. Orkan ku ta mal tempu ku bientunan mas haltu ku 119 km pa ora.

Orkanan ta keda klasifiká den kategoria di 1 te 5, kaminda kategoria 5 ta e orkan ku bientunan di mas fuerte ku por alkansá 250 km pa ora i ta okashoná dañonan devastador.

Tormentanan Tropikal i Orkanan ta forma un peliger pa nos dor ku:

  1. Bientunan fuerte ta supla for di direkshon kontrali i ta destruí kasnan i instalashonnan.
  2. Áwaseru duru ta keda kai pa hopi ora tras di otro i ta kousa inundashon na sitionan kaminda e tereno ta plat i abou.
  3. Olanan haltu i laman brutu ta kousa destrukshon i hasi daño na kosta.

 

Medidanan di Prekoushon

Perkurá pa bo dak di kas ta den bon kondishon.

Kontrolá si tur porta i bentana ta sera bon.

Sòru pa bo tin sufisiente multiplèks pa tapa bentana i portanan

Ta rekomendabel pa bo tin den kas un radio ku ta traha riba bateria, un set kompleto di promé asistensia (EHBO), sufisiente flèshlait/ lampi kerosin/bela etc, aparato pa paga kandela, bòter/djùk/hèmber pa warda awa di bebe.

Ta bon pa tur kas tin un kamber kaminda lo por skonde, loke nos ta yama un “Shelterbox”. Esaki mester ta un kamber chikí ku por wòrdu drecha pa por fungi komo tal. Un baño hopi biaha ta sirbi komo un lugá adekuá pa skonde komo ku e tin un bentana chikí kaminda tin ménos rísiko pa bientu hisa artefaktonan djafó manda paden.

 

Si dado kaso tin menasa pa un Tormenta Tropikal òf Orkan mester skucha notisia i avisonan ofisial via radio i televishon.

Esaki lo ser duna den dos fase.

Si tin un Tormenta Tropikal òf Orkan den serkania di Kòrsou, pero ainda no ta sigur ku lo e afektá Kòrsou servisio di Meteo lo emití un anunsio di “Tropical Storm Watch”.

E ora ei ta bon pa tuma e siguiente medidanan:

Sòru pa bo tuma bo medidanan di Prekoushon

Kap brasanan di palu ku ta kologá riba òf pega ku bo dak. Kita tur koko for di palu pa nan no hasi daño.

Perkurá pa den bo kura no tin artefaktonan los manera zim, bleki, bòter etc. Mara bomnan di gas i drùm di sushi.

Sòru pa bo tin sufisiente kuminda na bleki pa por lo ménos 3 dia.

Si bo ta usa remedi, sòru pa bo tin sufisiente na kas pa usa pa 2 siman.

Buska bateria èkstra pa bo radio, flèshlait etc i yena gasolin den bo outo.

Buska plakbant hanchu manera “duct tape” pa plak glas di porta i bentana.

Si bo ta duda den siguridat di bo kas anto palabra for di awor ku bo famia unda lo boso lo bai skonde ora resultá nesesario. No lubidá riba e bestianan di kas.

Sigui skucha notisianan ofisial via radio òf televishon.

 

Medidanan ku mester tuma ora servisio di Meteo emití un aviso di “Tropical Storm Warning òf “Hurricane Warning”.

Na momentu ku outoridatnan konsiderá ku e posibilidat ta grandi ku den 24 ora un Tormenta òf Orkan por alkansá Kòrsou ta saka un aviso di “Tropikal Storm Warning” si ta un Tormenta òf “Hurricane Warning” si ta trata di un Orkan. E ora ei ta bon pa:

Sòru pa tur medidanan di prekoushon ta tuma.

Sali bo kas na tempu si bo ta bai skonde pa mal tempu serka famia òf konosí. Tene kuenta ku kayanan ta yena ku awa i burakunan ku ta hasi korementu ku outo peligroso.

Kòrda sera bòter di gas, kita awa ku koriente.

Baha bo antène di televishon òf radio.

Warda tur produktonan kímiko i peligroso na un lugá sigur.

Tapa bentana i portanan ku multiplèks

Si bo no tin multiplèks pa tapa tur, sòru e ora ei di tapa esun di bo “Shelterbox”. Sobra benta i portanan di glas bo mester plak ku taip hanchu den forma di XX pa ora nan kibra nan no haña chèns di bula rònt.

Sera kortinanan i venetian blinds.

Klèm un lata den rant ariba di bo porta i bentana ku ta skùif pa evitá ku nan ta sali for di lugá.

Drecha bo kamber di skonde “Shelterbox” poniendo matras, radio, kos di paga kandela, set di artíkulo di promé asistensia (EHBO), flèshlait, kuminda, awa etc pa asina evitá di Sali for di e kamber durante ku e mal tempu ta pasando.

Tapa bo kosnan elektróniko ku plèstik.

Sigui skucha radio.

 

 

Durante un Tormenta Tropikal òf Orkan:

Keda paden di bo kas i eventualmente bai skonde den bo :Shelterbox”.

Usa telefon únikamente den kaso di emergensia

Si bo dak di kas bula bai pero bo murayanan di kas a keda para, keda den bo “Shelterbox”. Pafó riba kaya ta mas peligroso ainda ku paden

 

Por sosodé ku diripiente e bientu ta baha. No bai pafó sin ku outoridatnan a duna pèrmit via radio ku por sali pafó. Por ta asina ku ta e wowo di orkan ta pasando i despues di mei ora pa un ora bientu ku áwaseru ta bolbe kuminsá fuerte atrobe.

 

Despues di e Tormenta òf Orkan mester:

Sigui skucha radio pa notisia.

Si bo telefon ta traha ainda, usa esaki solamente pa kaso di emergensia ya e liñanan no ta blòkia.

Si despues di e mal tempu resultá ku abo mes i bo famia ta sano i salvo i tur kos den kas ta oké, bo por ofresé bo yudansa na bo bisiñanan òf famianan. Prinsipalmente hendenan ku tin mucha chikí, hendenan di edat avansá i hendenan ku hèndikèp.

Tene kuidou ku wayanan di koriente ku ta kologá abou òf a kai abou na suela.

No drenta outo pa bai buska kos di hasi kaweta. Kayanan lo ta bou di awa i peligroso dor di burakunan.

Herebé awa pa bebe i traha lechi.

Kuminsá rùim òp bo kas i rònt di esaki.

 

 

Pa mas informashon por konsulta www.meteo.an òf Hurricane Center na www.hurricanecenter.com

Krus Kòrá Korsou na www.kruskorakorsou.com

 

Esaki ta un servisio di Krus Kòrá Kòrsou pa nos komunidat por ta mas prepará pa e temporada aki di mal tempunan. Nos ta spera ku meskos ku e aña anterior e temporada aki lo ta hopi trankil.